بالتعــزي …. وااااااا “شرعية “

يجب قراءتها باللهجة التعزية كي يكتمل تذوق المبنى والمعنى..
……….( وشرعية )…..
…………………………
واااااشرعية شاموت عليك من الجوع
قد لي سنة وانا مريض وموجوع
لابس قميص بالي قديم ومرقوع
واصبحت اخاف واشرعية ومفجوع

الكهرباء من يوم خلقت مقطوع
تلصي نهار ونجلس غدر من اسبوع
ﻻ راي لك ولا كلام مسموع
عودي البلاد والراس يكون مرفوع
كم شتجلسي خادم لهم ومتبوع
………………
مو عاد معك وسط الرياض باقي
مو تعملي وايش الذي تلاقي
قدلك سنه واكثر على فراقي
قومي ارجعي وكبري السواقي
قالوا البلاد ممطور نعم وساقي
وبعد الغياب ماأجمل التلاقي
وانا معك شاعيش فقير وشاقي
………………
وااااااشرعية يكفي خلاص سذاجه
إمشي الطريق وبطلي العواجه
ومافيش معك من الخليج حاجه
والبيت خلي لا ماء وﻻ زجاجه
وابنك شموت يخور مرق دجاجه
……………….
وااااااشرعية.. ابنك بلا مصاريف
ﻻ عد جواب منك وﻻ مظاريف
ومافيش معه غيرك ولا معاريف
واللي معه باعه مع الشقاديف
مجنون قده يلقط الكداديف..!!
……………..
وااااااشرعية بنتك بلا عباية
والامن ضاع والشعب بلا حمايه
يكفي هدار وبطلي الدعايه
هيا ارجعي بالله عليك كفايه
والا اعملي لجلستك نهاية
……………..
واااااشرعية.. لو تسمعي حمادي
وطول النهار وهو يصيح ينادي
فوق الجبال والله العظيم ووادي
يدعي على اهل الخليج وهادي
مافيش معه قيمة قلص زبادي
…………
وفوق النكد والغلب والمضايق
داخل عدن يشتوا نعم بطائق
ويشتوا كفيل وكثروا العوائق
والناس تصيح وتشتعل حرائق
كيف عاد نعيش ويبقى المزاج رائق
……………….
وااااااشرعية.. كم داخلك من اوهام
وكم تكذبي طول السنيين والأيام
والحول خرب والشاجبة والاسوام
ابن الشمال هو من وقف ومن قام
واليوم جزاه ترفس ابوه بالاقدام
الناس بشر ماهم حمير وﻻ اغنام
وماهم عبيد واااشرعية وخدام
ﻻشرع لك والله صحيح وﻻ اسلام
تستاهلي والله رصاص واعدام
………………..
وااااااشرعية قد رحلوا المساكين
داخل عدن وغلقوا الدكاكين
والناس نعم قانصهم مجانين
وكم يابشر وسط الحدود مراكين
يا ويلهم اعمالهم سكاكين
او أصلكم وااااشرعية ركاكين
…………………